ڪِتاب: ھومر جي واٽ تي
ليکڪ: لاسلو ڪراسناھورڪائي
سنڌيڪار: معصوم ساحل

پنھنجي نثر جي سرمست رفتار ۽ بي مثال توانائيءَ سبب عالمي شھرت ماڻيندڙ لاسلو ڪراسناهورڪائي، هومر جي واٽ تي ۾ پاڻ کي به پوئتي ڇڏي ڏئي ٿو. ڀڄڻ جي ھڪڙي ڪلاسڪي خوفناڪ خواب تي ٻڌل هيءُ ڪتاب، رڳو سندس مخصوص تيز رفتار نثر جي زور تي ئي اڳتي نٿو وڌي، پر، ڪھاڻيءَ جي حدن کان ٻاهر نڪري، سِلوِسٽر ميڪلوس جي جهنگلي ڌنائتي موسيقيءَ سان به، جيڪا هر باب لاءِ الڳ ترتيب ڏنل آهي ۽ جنھن تائين پڙهندڙ ھر باب جي مُھڙ ۾ ڏنل QR  ڪوڊ وسيلي پُڄي سگهي ٿو. هن منفرد تخليق کي ميڪس نيومن جي خوبصورت، شديد اثر ڇڏيندڙ تصويرن وڌيڪ شاهوڪار بڻايو آهي.

”جڏهن هنگريءَ جو ناول نگار لاسلو ڪراسناهورڪائي ڪو نئون مختصر ڪتاب شايع ڪري ٿو، تڏهن اوهان فوري طور ڪجهه ڳالهيون سمجهي سگهو ٿا: اهو چريائپ سان ڀريل هوندو ۽ پنهنجي ئي چريائپ ۾ غرق هوندو؛ ان ۾ صفحن کان گهٽ جملا هوندا؛ گهڻو امڪان آهي ته ان ۾ فن پارا شامل ھُجن؛ ۽ پنھنجي ڊيگهه جي ڀيٽ ۾ بِنهه گهڻو ڳنڀير هوندو. ڪراسناهورڪائي جو نئون ڪتاب، Chasing Homer، شور، الجهن ۽ حيرت سان ڀريل هڪ تخليق آهي.“

— ول فينسٽرميڪر، Frieze